皇馬讓球勝舔利

猪拉多纳

羅渣士棄守 紅軍繼續不設防

俗語話「一朝得志，語無倫次」，雖然利物浦領隊羅渣士未至於語無倫次，但經過上季成功嘅球季後，佢就開始剛愎自用，死牛一邊頸，除咗死都要用單箭頭陣式外，防守問題亦長期未解決，但佢仍然死撐話「紅軍」唔需要防守教練，結果今季冇咗「一個救全家」嘅蘇亞雷斯，攻不銳守不穩嘅利物浦連場失利，連阿士東維拉、韋斯咸、紐卡素呢啲中下游分子都輸得，今晚喺歐聯B組作客近排勇到無倫嘅皇家馬德里，「紅軍」根本係連和嘅機會都冇，讓球主勝唔好錯過。

（有線61及201台周三凌晨3時45分直播）

「創業難，守業更難」呢句話其實都適合用喺足球上，冇錯，羅渣士上季帶領嘅利物浦的確帶畀球迷好多驚喜，踢進攻足球，娛樂性十足，更差啲打破曼聯、曼城同車路士嘅壟斷，幫「紅軍」首奪英超冠軍。羅帥「創業」成功，畀人捧到上天，但其實今季先係佢嘅考牌戰，能否喺「阿蘇」離隊、參戰歐聯嘅情況下Keep住上季嘅佳績。
欠防中踢殘謝拉特

球季開咗大概三個月，已經明顯見到羅渣士「守業」失敗，長期累積嘅問題陸續浮現，例如防守死球呢個問題由佢上任至今一直都冇改善，但佢堅持球隊唔需要防守教練，而且今夏買前鋒、進攻中場同後防球員，但就點都唔買防中，結果踢死謝拉特一個；羅渣士喺球員調動同排陣安排亦唔掂，無論球迷定球評家都見到「紅軍」要踢雙箭頭先有效，連巴洛迪利都出聲話唔鍾意踢單箭頭，但羅帥一於我行我素，死都要打單箭頭，睇嚟羅帥真係畀一季嘅成功沖昏咗頭腦。

皇馬上場歐聯作客利物浦，即使要為之後一場對戰巴塞隆拿而留力，但半場都輕鬆贏緊「紅軍」3粒，最尾Hea住保持呢個比數到完場，可以見到兩隊級數差幾遠。「銀河艦隊」贏埋巴塞後更係愈戰愈勇，C朗拿度繼續勁到癲，貴價新兵占士洛迪古斯亦完全融入球隊，加埋賓施馬、莫迪歷、卻奧斯，個個都能傳擅射，幾支炮對住「紅軍」弱雞防線，即使皇馬喺B組攞咗9分又點吖，呢班唔係人咁品嘅球星勒都勒唔住呀，讓球主勝咪走雞呀！