阿仙奴翻嗒安德列治

猪拉多纳

山齊士弗爆 歐聯食住上

足球比賽有時好波不如好運，阿仙奴上輪歐聯作客安德列治，最後兩分鐘連入兩球，戲劇性反敗為勝，唔止全取3分，仲打起番信心，連英超成績亦大為改善，睇來兵工廠已轉運。今晚歐聯D組賽事，阿仙奴回師主場再鬥比利時球隊安德列治，淨贏兩粒應該係最低消費，一於直取讓球主勝。

（有線64及203台周三凌晨3時45分直播）

高水平賽事，球員心理質素往往先至係決定勝負最大關鍵因素，一旦踢得唔順，明明可以輕勝，但卻變得舉步維艱。阿仙奴前排喺英超，試過7戰僅1勝，連侯城都贏唔到，不過上輪歐聯對安德列治，劣勢下反勝，成為心理關口轉捩點，果然近兩場英超都贏得清脆，尤其係阿歷斯山齊士兩場轟入4球，狀態弗爆腳風順到冇朋友，明顯阿仙奴已重上正軌。

喺小組形勢方面，阿仙奴現時領先第3位安德列治5分，只要贏埋今仗加上有9分在手嘅多蒙特唔輸波，就可以提早出線，為免夜長夢多，領隊雲格應會速戰速決，盡快贏多幾球，搞掂安德列治，再集中力量踢英超。
安德列治頹爆

反觀安德列治，佢哋3戰僅1分，論戰績根本未夠班喺歐聯立足，近況亦好曳，近7場比賽贏得1場咁大把。同埋佢哋上輪歐聯對阿仙奴，由贏變輸，加上日前喺聯賽輸畀死對頭標準列治，連續遭受重大挫折，都咪話唔傷，今仗去到倫敦比賽，一旦先失波，好可能即刻散晒大敗而回。