歐聯巴塞-1夠贏有凸

猪拉多纳

倒戈阿積士 阿蘇冇面畀

蘇亞雷斯相隔4年，再戰歐聯，首戰即回到成名地，為巴塞隆拿作客鬥阿積士，呢位烏拉圭前鋒復出兩仗，巴塞都輸波而回，佢亦食足兩場白果，堂堂歐洲金靴獎得主變成黑腳，認真濕滯。不過，以「哨牙蘇」蠱惑性格，肯定唔熟唔食，重返「福地」阿姆斯特丹球場，正好趁機重拾射門鞋，誓打翻身仗。加上有美斯同尼馬兩大天王協助，巴塞作客雖然仍要讓一球，但以佢哋實力淨贏兩球或以上其實並唔難，直取讓球客勝。

（有線63台周四凌晨3時45分直播）
重返福地求開齋

蘇亞雷斯對上一次踢歐聯，已經係2010年12月，分組賽為阿積士擊敗AC米蘭，其後轉投利物浦就無緣歐聯。佢去年5月不惜同紅軍鬧翻，話要加盟有份踢歐聯嘅球隊，幾乎自毀前程，可見佢極渴望參與呢項大賽。偏偏又因世盃咬人事件停賽，搞到要等到第4輪先至可以正式登場，可謂好事多磨，但亦進一步增加「哨牙蘇」嘅饑渴感，要盡情喺歐聯騷哥利。

上天似乎有意幫蘇亞雷斯一把，重返歐聯首仗遇上阿積士，佢曾為呢支荷甲勁旅上陣110次轟入81球，包括以隊長身份為阿積士贏過荷蘭盃冠軍，佢對阿姆斯特丹球場絕不陌生，甚至係佢嘅「福地」，相信阿積士fans亦歡迎佢回歸，變相返到「主場」，有利佢發揮，趁機開齋入波。
大蝦細強攻盡數

阿積士3戰仍未贏過，包括首循環作客1比3不敵巴塞，級數同歐洲豪門有距離。雖然話佢哋上屆曾於主場擊敗巴塞，但要留意當時美斯缺陣，今仗唔止有美斯同尼馬，再加埋蘇亞雷斯，阿積士更難招架。事實上，兩隊踢法相似，同樣注重以地面推進進攻，講到呢種戰術，巴塞最耍家，可謂大蝦細，剋死阿積士。

巴塞剛啱經歷西甲二連敗，更加想喺歐聯戰場贏番場漂亮勝仗，省番靚金漆招牌，因此勢必強攻，務求盡數對手，巴塞作客讓波難唔到佢哋，讓球客勝捧得過。