愛華頓贏質素 玩謝里

猪拉多纳

經過一連兩晚上演歐聯賽事，今晚輪到歐霸盃接力，其中英超球隊愛華頓喺H組主場迎戰法甲里爾，比利時雙星盧卡古同奧歷治交鋒必然成為焦點，不過論到兩軍人腳質素同近期表現，「拖肥糖」明顯佔優，1.73倍主W值得捧場。

（有線61及201周五凌晨4:05直播）

愛華頓早前經歷連續4場作客嘅惡啃賽程之後，最近演出逐漸復甦，連同上輪歐霸盃作客賽和里爾，同埋英超大炒阿士東維拉同般尼，佢哋近4場錄得2勝2和未輸過，表現畀到人唔少信心。雖然「魔獸」盧卡古喺今屆歐霸盃仲未開齋，但佢喺近3次主場出擊嘅其中兩場都有斬獲，今場勢必搏盡打破入球荒。至於箭頭伊度奧過往喺歐洲賽累積攻入48球，係今屆歐霸盃分組賽中累積入波最多球員。講活力有盧卡古，講經驗有伊度奧，今輪返到主場出戰歐霸，相信唔難搵到食。

相比比利時同鄉盧卡古有艾登麥基迪、賴史密夫等猛將喺側邊傍住，効力里爾嘅奧歷治就冇咁幸福，身旁缺少高質球員，往往要靠自己單打獨鬥。最弊係奧歷治近排狀態麻麻，已連續5場食白果。而且里爾作客例牌腳軟，歐洲賽連同法甲近6場得2和4負劣績，輸波嗰4場全部吞蛋收場，全隊加埋入得2球，真係曳到冇朋友。即使里爾分組賽連和3場，可惜今晚造訪葛迪遜公園，怕且幾難有分落袋。

歐霸盃H組