(六)12 法蘭克福 Vs 拜仁慕尼黑

猪拉多纳

德甲法蘭克福主場鬥拜仁慕尼黑，拜仁啱啱喺歐聯輕取羅馬後，已提前兩輪穩得小組首名資格，可以將全部注意力放返聯賽，何況下周係國際賽，踢埋呢場有排抖，今仗唔會有任何保留，中後場主力阿拉巴喺對羅馬一役受創缺陣，預期教練哥迪奧拿會排出更進取戰術，安排洛賓、馬里奧葛斯、列貝利同羅拔利雲度夫斯基齊任正選攻堅。

法蘭克福近況低沉，防線缺少咗奇雲查普同森拜奴後明顯不穩，加上教頭舒哈夫崇尚進攻足球，益晒拜仁打反擊，讓球客勝同入球大都捧得過。

（有線61及201台周六晚10時30分直播）