紅軍抖足鍊車 謝四大報復

猪拉多纳

歐聯Hea踢擺明搏今鋪！

相信好多利物浦球迷到依家仍記憶猶新，「紅軍」喺上季英超尾段彈出，個個都諗住佢哋可以拎到失落多年嘅聯賽冠軍，點知喺倒數第3場對車路士嗰陣，「神奇隊長」謝拉特喺中場跣腳，畀丹巴巴亞射入致勝球，斷送英超冠軍夢！今晚紅藍大戰，利物浦主場再撼車路士，相信「謝老四」一定打醒十二分精神，帶領班手足喪攻報仇，同車仔合演入球騷，撐1.92倍入球大！
派B隊鬥皇馬

利物浦喺歐聯分組賽首循環鬥皇馬慘吞3蛋，次循環照計應該搏盡踢場爭氣波，點知領隊羅渣士未踢已經投降，收起隊長謝拉特、佐敦軒達臣、巴洛迪利同史達寧等7名主力，派「紅軍B隊」Hea踢算數，擺明留力今晚「鍊車」！最後羅渣士「得償所願」，利物浦被皇馬「雙殺」，可以專心一意踢聯賽。

上季「紅軍」憑蘇亞雷斯同史杜列治嘅「SAS」進攻組合喪入波，本應好大機會拎到球會史上首個英超冠軍，但卻因為「神奇隊長」喺對車仔一仗腳軟跣腳，造就依家踢緊比錫達斯嘅丹巴巴亞，為車仔射入絕殺球，相信「謝老四」到依家都仲係耿耿於懷，今晚再度同車仔交手，相信佢一定會專注為「紅軍」報仇，一雪前恥！
慘被寸王狂插 藍戰士喪攻發洩

另邊廂，車路士聯賽10戰不敗穩坐榜首，養傷抖咗成個月嘅「狂牛射手」迪亞高哥斯達上仗傷愈復出，雖然對住昆士柏流浪冇斬獲，但表現依然出色，狀態冇問題！再講，車仔日前喺歐聯同弱旅馬里博爾賽和1:1，搞到「寸王」莫連奴嬲到震，半場喺更衣室喪插班球員，一眾「車手」被「寸王」省完後肯定谷住道氣，今晚應該會大踢爭氣波。「紅軍」要報仇，車仔則力保榜首，兩軍各有喪攻目標，相信今晚會合演入球騷，捧入球大就啱晒喇！
盤路解碼

兩軍近9次會師晏菲路，開出1單8雙。
Data King：車仔近年對賽一面倒

‧利物浦近4次對賽未贏過車仔，連續4次半場落後。

‧「車仔」翼鋒夏薩特近3次喺英超同利物浦交手射入2球。

‧「藍戰士」喺對上11次聯賽中，9場至少2次攻破對手大門。
乜都玩錦囊：藍戰士超班博埋客W

事實證明冇咗蘇亞雷斯同史杜列治嘅利物浦只係中游分子，今仗就算有主場之利都冇乜甜頭。再者，「紅軍」近5戰有4場食白果，相反「藍戰士」至今仍保持不敗身，早前作客曼城同曼聯只係臨尾香先攞唔足3分，相信一眾「藍戰士」今仗肯定加倍留神，博埋2.03倍客勝。