皇馬弗爆大踢華麗足球

猪拉多纳

「同花順」擔正攻堅！

皇家馬德里周中歐聯迎戰利物浦，喺全場控制比賽之下，由賓施馬一箭定江山贏波，將連勝場數推高至12場，班波嘅士氣同狀態都冇得頂。「銀河艦隊」今晚西甲再度坐鎮主場迎擊華歷簡奴，球星基斯坦奴朗拿度賽前勁騷歐洲金靴獎，嗌齊職球員影大合照攞威，今場肯定趁機大勝對手開派對慶祝，皇馬讓到三球都照捧2.28倍「讓主」。

（now632周日凌晨3:00直播）

隨住死敵巴塞上輪全失3分，皇馬暫時升上榜首。「銀河艦隊」自9月中旬開始，一直保持高水準演出，特別係連奪3個個人獎項嘅C朗，狀態更係弗到漏油，雖然周中欠運未有「士哥」，不過同隊友嘅默契愈來愈好，再加埋加里夫巴利已經復出，令到陣容更為完整，今晚「同花順」隨時擔正，入波點會冇保證先？
挑戰連贏15場紀錄

再者皇馬主帥安察洛堤挑戰緊球會15場嘅連勝紀錄，家陣贏到第12場，把口就話唔理呢啲紀錄啫，不過張峰覺得有得贏唔通唔想贏咩？今場仲要喺巴拿貝球場出擊，相信C朗、賓施馬、占士洛迪古斯等鋒將都會識做，實行趁勢再喺西甲大勝多場。

華歷簡奴防線唔掂

另邊廂嘅華歷簡奴近況麻麻，接連輸畀伊巴同馬拉加不特止，兩場夾埋勁失7球，呢條「豆腐防線」作客去到巴拿貝咪盞任人魚肉。唔好忘記上季華歷簡奴喺呢個球場都捧住5隻光蛋返歸，今晚歷史重演嘅機會真係幾高o架！
乜都玩錦囊：皇馬近8場半場7場開大

皇家馬德里近期走勢超勁，已經連贏12場。「銀河艦隊」過去8場半場大細，有7場都開到大，1.53倍嘅「半大」追得過。