火車頭人腳齊捧客W

猪拉多纳

今日有場莫斯科打吡，由魚雷主場對火車頭，魚雷呢隊波愈踢愈沉，開季14場俄超連俄盃只贏過一場，對住中游隊伍火車頭唔輸有鬼，呢場波正路一定要1.54倍客勝。

魚雷目前只得6分排俄超尾二，佢哋為咗起死回生，最近換咗教頭，由柏查高夫走馬上任，但係當地嘅足球專家完全唔睇好佢可以做白武士救番隊波，有人仲質疑點解佢夠膽接棒，因為魚雷嘅問題唔單純係攻擊力弱，實質成隊組織都存在問題，俄超名家連霍特直情話魚雷前任主帥沙域捷夫劈炮，原因在於隊波冇前途可言，同榜尾嘅圖拉兵工廠一樣咁衰。
火車頭往績佔優

相對嚟講，火車頭嘅表現算得上係恰如其分，呢班波人腳唔算標青，但都有幾件摩洛哥、塞內加爾同克羅地亞國腳，比起冇錢買人嘅魚雷，陣容實淨好多。佢哋近況亦相當唔錯，起碼最近6場波冇輸過，而且作客和過高半班嘅莫斯科斯巴達，主場直頭贏埋莫斯科戴拿模，如果唔係前鋒泰拉索夫有傷，火車頭個「4-3-3」陣式會發揮得仲好，以佢哋近3次作客魚雷攞到2勝1和嘅紀錄去睇，往績佔優，今日開客勝好正路。
（六）9 莫斯科魚雷 Vs 莫斯科火車頭