榜首大戰PSG坐底贏兩粒

猪拉多纳

伊巴復出撞正馬賽唔齊腳

法甲今個禮拜有場榜首大戰上演，由排第2嘅巴黎聖日耳門（PSG）主場迎戰領先4分嘅榜首馬賽。PSG近期頻頻贏波氣勢如虹，今仗仲有「瑞典神鋒」伊巴謙莫域傷愈可以復出，面對有3名主力停賽嘅馬賽，相信有望贏波再拉近雙方嘅距離。PSG近4次喺主場對馬賽都贏2比0，阿King睇好今仗可以再開呢個比數，讓球主勝、PSG贏同2比0波膽3瓣都值得一試。

（TVB302周一凌晨4時直播）
再追2比0特旺波膽

PSG近期贏波停不了，球隊上周聯賽作客鬥羅連安特，喺先失守下藉停賽復出嘅卡雲尼扳平，加上小將巴希碧克奠勝，以2比1反勝取得聯賽3連勝，繼續保持不敗身及進一步逼近榜首。PSG喺上周三歐聯分組賽主場小勝尼科西亞提早鎖定出線席位，令球隊而家可以專心應付聯賽，而自9月下旬一直受傷缺陣嘅前鋒伊巴謙莫域，終於喺周四正式復操，今仗可候命上陣，球隊雖有中場莫達與後衞雲達韋爾停賽，但主場有望贏波延續連勝佳績。

馬賽喺聯賽同法聯盃遭逢連敗後，上輪法甲返主場對朗斯，最終贏2比1成功止血。不過，馬賽今仗有3名球員包括前鋒阿休、中場羅馬奧以及守將莫雷停賽，對整體戰力有一定影響。馬賽近年作客對PSG例冇運行，對上4次輸晒之餘更每場咁啱都係輸0比2，阿King認為今仗大有機會再開呢個波膽，而讓球主客和PSG讓一球，當然係捧讓球主勝啦！
中央陸軍近況「模」敵

其餘賽事，俄超莫斯科中央陸軍近期作客表現理想，日前更於歐聯客勝勁旅曼城，球員士氣同狀態都一流，今仗面對中游球隊莫斯科戴拿模有力贏波，平手盤值得支持。

（now 671周日晚6時30分直播）

至於蘇超鴨巴甸雖已連贏3場，但今仗有後衞羅素安達臣及奇勒羅拔臣未必能趕及上陣；反觀些路迪中場甘文斯今仗傷愈復出，拍住腳風甚順嘅約翰古達迪，今仗要擊敗鴨巴甸唔係難事。

（亞視國際台周日晚8時30分直播）