多蒙特慕遜駁火演入球騷

猪拉多纳

今季德甲最大話題，首推係多蒙特全面崩潰，季前被視為拜仁最大挑戰對手嘅「蜜蜂兵團」，聯賽5連敗後竟跌到落尾2，歐聯得分仲要多聯賽5分，實在係球壇一大詭異事件！多蒙特唔想萬劫不復，今晚主場迎戰慕遜加柏肯定傾巢而出，兩隊都有頂級攻擊球員壓陣，1.52倍大冇走雞。

（有線61、64、201及203周一凌晨0:30直播）
歐聯出線專注力移向德甲

多蒙特上仗德甲輸畀拜仁後，聯賽衰到連輸5場，近7場更只係拎得1分，堪稱係奇恥大辱。不過又有幾多人信多蒙特會一直衰落去？睇番佢哋啱啱喺歐聯提早出線，表現同喺德甲判若兩隊，可見多蒙特沉淪係心態多於實力問題。阿占覺得「蜜蜂兵團」今季早就將注意力放喺歐聯，只係估唔到聯賽會踢得咁差，依家既然歐聯提早出線，自然會重新專注番德甲，即使馬高列奧斯同門將維丹費拿患腸胃流感未知出唔出得，但係恩莫比尼近期上晒力，數胡能力絕對唔使懷疑。

慕遜加柏都唔係善男信女，開季至今未逢一敗，今仗作客將會踢番最擅長嘅穩守突擊，前面靴爾文同麥斯古斯腳風唔錯，再者班波由守轉攻效率一流，肯定可以考驗多蒙特唔多穩陣嘅防線，好大機會上演入球騷。
頂占筍盤：多蒙特（入球大）