法甲榜首戰 PSG 馬賽做細界

猪拉多纳

法甲今晚上演榜首大戰，巴黎聖日耳門會喺主場惡鬥馬賽，與其估邊隊贏波攞到3分，倒不如信往績揀入球細仲好。雖然聖日耳門王牌伊巴謙莫域已經復操，但佢未肯定可以打正選，就算可以披甲，踢足全場機會亦唔大，加上馬賽有進攻主力阿休坐波監，大家都少咁件猛嘢，唔容易開入球騷，一於博1.9倍入球細。

（TVB302周一凌晨4:00直播）
伊巴謙剛復操未夠態 馬賽阿休停賽影響大

雙方對上5次碰頭，聖日耳門全部贏晒，不過當中有4場開2:0波膽，只得上季作客贏2:1開入球大。PSG王牌射手伊巴謙莫域上周四先至復操，係咪咁快可以回復「托弗」狀態真係好難講，何況中場莫達同右閘雲達韋爾停賽缺陣，唔齊腳想谷都未必谷得起，假如伊巴謙莫域好番冇耐行行企企，球迷睇到瞌眼瞓都唔奇。

睇番積分榜形勢，馬賽目前以4分騎住聖日耳門，為咗守住榜首位置，今場當然唔希望輸波。況且佢哋有前鋒阿休、中場羅馬奧同後衞莫雷坐波監，當中以阿休缺陣影響最大，再加上佢哋喺近5次鬥PSG只得1個入球，今戰作客巴黎唔慌入得多波，隨時玩1分政策死守，開入球細機會更加大。