噴射機Cap水大作戰

猪拉多纳

今日有場澳職獨腳戲，衞冕總冠軍嘅布里斯班獅吼作客紐卡素噴射機，獅吼新一季大跌Watt，4戰全敗勁羞家，但其實噴射機都未開齋，雙方求勝心切會踢得更進取，入波唔會少，阿King推介入球大畀大家。

（有線64及203台周五下午4時40分直播）

紐卡素噴射機賽前喺官網呼籲球迷購買季票，話呢個係支持球隊嘅最好方法，但噴射機要球迷使成135美元（約1,047港元）買季票睇餘下嘅12場主場賽事，都要踢出成績先得，冇理由要班粉絲入場睇住球隊輸波，佢哋實會揼晒心口，覺得倒錢落鹹水海。

噴射機今季澳職踢咗5場波都未開齋，今場對獅吼係第2次主場作賽，其實噴射機上場主場對墨爾本勝利都爭啲贏到，可惜領先兩球都畀人極速追番，今場惟有再嚟過，以全取3分為目標，以表現說服球迷買季票。而上季冠軍布里斯班獅吼亦極需要一場勝仗振士氣，今場料會同主隊鬥攻，隨時令脆弱嘅防線變得更為形同虛設，捧大啱數。
高車士打客戰靠得住

另外今晚亦有場英甲獨腳戲，班士利主場對高車士打，高車士打近期作客表現不俗，近三客戰都能保不敗，今場受讓值捧。最後講多場阿甲賽事，羅沙里奧中央主場迎戰沙士菲，沙士菲作客六連敗，梗係捧主勝啦！