德國「-7」照炒直布羅陀

猪拉多纳

歐國外D組今晚上演德國迎戰直布羅陀嘅「天與地之戰」。德國依家係球壇「冧巴溫」，直布羅陀就係新埋班嘅雜牌軍，唔使講都知，今場好大機會係德國隊嘅派蛋戰啦！一班射得之人好似湯馬士梅拿、馬里奧葛斯、普多斯基等肯定會盡情數胡。畢竟雙方實力相差太遠，德國讓7球都冇問題，1.48倍「讓主」必捧！

（有線64及203周六凌晨3:45直播）
比亞荷夫：等睇入球騷

德國攞完世界盃後表現回落，近兩場外圍賽只得1和1負，依家喺小組排第3。好在士氣仍然唔錯，賽前仲拉隊去為世界盃電影《球隊》宣傳，輕鬆一下！雖然舒賀爾尼、達斯拿、奧斯爾同馬高列奧斯等主力受傷冇入選，不過「日耳曼兵團」又唔憂冇人喎，湯馬士梅拿同馬里奧葛斯喺拜仁慕尼黑愈夾愈有默契，比拿拉比同普多斯基又各自要為搶正選位搏殺，好大決心去爭取入波。

德國球隊經理比亞荷夫賽前講明：「雖然呢句話聽落有啲奇怪，不過希望我哋隊波今場可以攞到好多好多入球，踢出精彩嘅進攻足球等班擁躉興奮吓。」

事實上，由大部分業餘球員組成嘅直布羅陀，歐國盃係成軍後首個參加嘅國際大賽，之前對住波蘭同愛爾蘭都要分別吞咗7蛋，今晚面對德國嘅超強火力，最終個「食蛋指數」可能會非常驚人！
歐國外D組：頂占筍盤：德國（讓球主勝）