百戰朗尼 洛力搶W

猪拉多纳

爭做三獅士哥神

周日凌晨歐國盃外圍賽E組對決，英格蘭與斯洛文尼亞會師倫敦溫布萊，「三獅隊長」朗尼踏入百戰里程碑，賽前將獲卜比查爾頓頒「金喼帽」，今場勢必搏盡，繼續向英格蘭史上士哥王寶座邁進，1.83倍「讓球主勝」值得捧場。

（有線61及201周日凌晨1:00直播）

朗尼喺上個月兩場歐國盃分組賽都有斬獲，今場只要再有入波嘅話，最低限度已經追平名宿格里夫斯，以44球並列英格蘭史上No.3射手，而且今仗係佢代表「三獅軍團」第100場嘅歷史性時刻，仲會着埋特製「百戰波砵」落場，唔使問肯定搶韁爭入波啦！

英格蘭中場卡域克喺日前訓練整親腹股溝無奈退隊，好在「三獅軍團」中前場人腳鼎盛，除咗韋舒亞、佐敦軒達臣、占士米拿幾員猛將，史達寧同阿歷士張伯倫等年輕新星亦夠煞食，加上事隔多時重返國家隊嘅禾確特，同埋首度躋身大國腳嘅比拉希奴，主帥鶴臣可謂成手好牌任佢揀。
斯洛文尼亞防線老餅

更何況史達寧、阿歷士張伯倫、禾確特等人靈巧速度兼備，今晚落到場相信佔得唔少甜頭，事關斯洛文尼亞防線堪稱「老人院」，一對中堅保斯贊施薩同白蘭高伊歷以及右閘碧高，全部年過三十，體能同速度都唔夠一班後生仔揮，隨時被玩到陀陀擰，失兩、三球波有咩出奇。

但其實講到老喇喎，一對喺日職搵食嘅箭頭路華高域同隆比真歷都已經三張嘢，其中包辦斯洛文尼亞分組賽所有入波嘅路華高域更年屆35，今場造訪分組賽未失過波嘅「三獅軍團」，睇怕呢位「老人家」想唔食白果都幾難。今場一於捧「讓主」，見證朗尼喺溫布萊慶祝國家隊百戰啦！

歐國外E組
Data King：三獅軍對賽贏晒

‧英格蘭近8戰開6次「半場和」。

‧斯洛文尼亞連開8口「半場細」。

‧兩軍曾兩次交鋒，「三獅軍團」全勝。
盤路解碼：斯洛文尼亞近5場作客敗仗全部吞蛋收場。