小保加留力益晒沙蘭迪

猪拉多纳

周中南球盃演「國家打吡」

嚟緊周中舉行嘅南美球會盃4強上演阿根廷國家打吡，小保加首回合於主場迎戰河床，呢個經典戲碼，每逢喺阿甲上演都會掀起炒飛熱，今次兩隊喺南球盃碰頭，據報貴賓飛已經被炒至2千美元一張，折合大約1萬5千蚊港紙，價錢足以去一次短途旅行，真係誇張。

既然呢場打吡咁受矚目，兩軍今晚於阿甲分途出擊留力唔出奇，尤其現於聯賽榜排第五位嘅小保加爭標機會不大，今場又要作客出戰沙蘭迪兵工廠，教練阿魯巴蘭拿唔排除會收起部分主力，尤其啱啱傷愈冇耐嘅前鋒桑馬天尼斯、後衞丹尼爾戴亞斯及古勒莫貝迪素，預計正選上陣機會不大。

沙蘭迪兵工廠上周末聯賽喺補時超過九分鐘情況下被拉魯斯反勝3比2，球員谷埋一肚火，周中對獨立隊停賽嘅中場拉美路卡里拉及華斯歷今仗可以復出，主場有力坐和望贏，平手盤捧沙蘭迪兵工廠。

（周一早上8時30分開賽，馬會網上文字直播）
河床鬥「作客蟲」照搶

另一主角河床則於較早時間主場迎戰奧林普，奧林普擺明係「作客蟲」，今季8場作客聯賽未贏過，河床亦要全力搶分保住榜首位置，有主場之利嘅河床就算有南球盃後顧仍可睇高一線，捧讓球主勝。

（周一清晨5時15分開賽）