比利時肉緊主場攞威

猪拉多纳

贏波確保初登世界第三

歐國盃外圍賽B組，比利時主場迎戰暫居榜首嘅威爾斯，客軍有皇馬球星加里夫巴利壓陣，矢志一騷56年之癢，再次殺入大賽決賽周，不過主隊比利時平均實力高出豈只一皮，而且只要今仗主場報捷，將可確保喺即將公布嘅世界排名中升上第三嘅歷史新高，無論國家足總、領隊韋莫斯同一眾戰將都好肉緊，誓要寫下國家足球史新一頁，Anton相信比利時有力大炒對手，推介讓球主勝。

（有線64及203台周一凌晨1時直播）
熱身賽贏冰島都要鬧

比利時同威爾斯喺之前嘅世界盃外圍賽亦同組，今仗係兩年來第三次碰頭，喺世界盃外圍賽，比利時作客贏過2比0，然後主場和1比1，但要留意比利時主場對威爾斯一仗前三日，已經因為贏咗克羅地亞而提早出線，慶祝過後根本冇認真踢嗰場例行公事。

嚟到今日，比利時嘅戰意唔同晒，佢哋目前世界排名已升至第四位，只要今仗勝出，仲可以確保升上史上新高嘅前三位置，全隊上下都好肉緊，上周中主場同冰島踢熱身賽，韋莫斯輪換大部分主力都贏3比1，但陣上攻守表現都唔理想，門將泰拔高圖爾斯賽後對一眾後衞大發脾氣：「如果你哋唔肯走多步，繼續懶懶閒，應該坐番去後備席啦！」領隊韋莫斯賽後亦話，球隊會好好檢討，對威爾斯一仗肯定會大幅改善。嘩！一場熱身賽贏咗都要鬧，鬥心可想而知。
榜首威爾斯賽績平庸

威爾斯喺國際賽沉寂多年，如今終於出到個加里夫巴利，配合阿仙奴嘅艾朗藍斯同利物浦嘅祖阿倫，前線總算有啲睇頭，喺今屆外圍賽頭三場兩勝一和，暫居B組榜首，令舉國歡騰，國內傳媒話好希望把握今次機會，自1958年瑞典世界盃後，再次殺入決賽周。不過Anton要撥吓冷水，皆因佢哋目前有此成績，都係因為賽程有利，佢哋所贏兩場分組賽，都係小勝同組最弱嘅安道爾同塞浦路斯一球，主場對波斯尼亞都贏唔到，賽績其實好平庸，除咗三位中前場球星較有卡士外，其餘位置戰將水準差好遠，根本冇得同粒粒皆星嘅比利時相提並論。