墨爾本城送走韋拿仲爽咗

猪拉多纳

澳職「富豪球會」墨爾本城減星味，演出仲醒神！星級射手韋拿離隊後，球隊即於上仗打開勝利之門，估唔到呢位西班牙前鋒原來係「黑腳」。其實歸根究柢，因為冇咗韋拿，球員冇得再依賴佢，各人反而更落力，踢得更放，效果仲好。墨爾本城主場對4連敗嘅中岸水手，主Ｗ值得再追。

（有線64及203台周日下午2時直播）

曼城「子球會」墨爾本城今季人腳變動大，包括曾借入韋拿，季初需時磨合，頭4場聯賽都贏唔到，但上仗卻作客爆冷3比1擊敗上季總冠軍布里斯班獅吼，三位土炮大衞威廉斯、杜簡錫、麥克馬連奴表現Sharp醒，證明唔一定要有球星先至會有好成績。墨爾本城贏到呢場關鍵勝仗後，肯定大大提升士氣同信心，返回主場氣勢更旺盛。

中岸水手走勢剛好相反，連盃賽開季3連勝，但最近連輸4場，尤其係防守好曳，往往上半場已頂唔住落後。加上水手剛於上周中踢完澳足盃，又要作客比賽，飽受舟車勞頓之苦，情況更加危。
高士路南錫勝算高

另外，巴西榜首球隊高士路正全力爭標，作客面對近6仗不勝嘅山度士，必定全力爭勝，平手盤必捧高士路；法足盃乙組南錫作客非聯賽球隊蒙斯奧，南錫近八場不敗走勢佳，有力於法定時間贏波，捧客W。