意大利冇腦 格仔兵好路

猪拉多纳

世盃過後唔少名牌球隊都換帥，當中意大利搵咗前祖雲達斯教練干地領軍，呢位少帥上任後4戰全勝，不過今晚主場鬥歐國盃外圍賽H組榜首克羅地亞先係真正考驗，撞正一眾中場大腦缺陣，唔似讓得起對手平半，都係揀2.06倍下盤好過。

（有線61及201、中央5台周一凌晨3:45直播）

少帥干地上任後連贏4場的確係個好開始，但睇番對手只係阿塞拜疆、馬爾他之流，真係不宜過分高估。況且呢4場波「藍衫軍」所入嗰7球中，有3球係後衞基亞連尼同邦路斯貢獻，可見干地仍然摸索緊球隊嘅攻擊模式。
派路缺陣靠百戰迪羅斯

意軍今次重召巴洛迪利同艾沙拉維兩大射手，但巴神剛剛練波整親，同有傷嘅守衞奧邦拿一齊退隊。況且意大利不嬲最需係一粒CPU支援球隊運作，打開骰嘅中場核心派路今仗缺陣，後備發電機蒙杜利禾冇入選，另一中場馬高華拉堤早前又因傷退隊，就算今仗係迪羅斯第100次為國上陣鬥心十足，但要呢位老將一個應付當打嘅「格仔雙核心」莫迪歷同拿傑迪錫，似乎強人所難囉！
克羅地亞小組3連勝

另邊廂克羅地亞喺H組3戰全勝，攻入9球兼未失1球，攻守表現的確比意大利優勝。咪睇「格仔兵」上場輸畀阿根廷就對佢哋冇信心，實情主帥尼高高華不知幾醒，明知場熱身賽唔重要索性盡出副選，所以唔使驚佢哋體能會輸蝕。而且克國傳奇射手兼足總主席蘇加賽前都話呢場波唔係咩生死大戰，暗示唔需要冒險鬥攻，咁就更易延續佢哋對藍衫軍72年嚟嘅不敗紀錄啦。
歐國外H組：盤路解碼

克羅地亞今年踢11仗有8場保持不敗，不敗率達73%。
Data King：交手旺開半場細

‧雙方7次交手，意大利只得1勝3和3負。

‧雙方7次交手開出6口半場細。

‧意大利領隊干地上任後4戰全勝。
乜都玩錦囊：意大利死火捧細

意大利正進入重建期，近2場鬥3線球隊阿塞拜疆、馬爾他夾埋入得3粒咁多，鋒力有限。雖然藍軍重召射手艾沙拉維，但佢復出後入得1球，點信得過先！況且克羅地亞又唔急住搶攻，入球唔慌多捧1.52倍入球細啱數。