墨爾本城火力夠 主W打落「水」狗

猪拉多纳

韋拿離隊 前鋒即時大解放

墨爾本城喺西班牙球星韋拿離開後，大衞威廉斯、杜簡錫同麥克馬連奴幾名鋒將即時獲得「大解放」，上場作客輪流攻破衞冕總冠軍布里斯班獅吼大門，協助墨爾本城敲響聯賽勝鼓。今日返到主場迎戰中岸水手，睇好佢哋可以趁對手近況低迷再下一城，揀1.75倍主勝啱數。

（有線64及203周日下午2:00直播）

墨爾本城中場阿倫穆爾、後衞史提芬莫克雖然因踢國際賽缺陣，不過呢班波反而「因禍得福」，事關澳職賽會規定任何一隊只要有兩名球員為國服役，就可以短簽球員應急，墨爾本城就係咁羅致到中場猛將米拿！
中岸水手近況曳連輸4場

咪睇米拿已經三張嘢有多，呢位前愛爾蘭國腳踢過曼聯、些路迪等英倫球會之外，更係獅吼上季奪得總冠軍嘅重要功臣之一，無論實力同經驗喺澳職都夠晒照，佢今場拍住前國家隊隊友杜夫喺中場鋪橋搭路，杜簡錫、麥克馬連奴等鋒將肯定大把「餐士」，要趁機取得聯賽主場開門紅話咁易啦！

相反客軍中岸水手近況曳到爆，澳職連同澳足總盃連輸4場，其中3場聯賽除咗對手送咗球烏龍波之外，成隊夾埋1球都未入過，加上幾日前喺澳足總盃4強力戰不敵阿德萊德聯，唔單止士氣嚴重受挫，射手麥西蒙仲打埋柴，今場造訪墨爾本冇本錢反彈，1.75倍主勝為不二之選。

滚波男