銀河海灣者射手大晒冷

猪拉多纳

美職季後賽東西岸決賽開打，重頭戲當然係洛杉磯銀河主場硬撼西雅圖海灣者嘅西岸決賽；兩隊喺常規賽入面係成績最好、攻力最強嘅球隊，全因兩軍都有星級球員坐陣，實力梗係強啦！銀河今場喺主場要全力爭勝，而海灣者就要力爭作客入球，雙方都唔玩死守，捧入球大就最啱數。

（TVB 302周一早上6時直播）

洛杉磯銀河上場西岸四強次回合喺主場大炒皇家鹽湖城5比0，其中季尾就會掛靴嘅當路雲大爆發，大演帽子戲法，睇得佢真係好有決心，想以一個美職總冠軍嚟幫自己嘅職業生涯畫上完美句號。由於季後賽賽制係採取主客兩回合，銀河要殺入總決賽，今場喺主場出戰唔贏唔得，為免下場作客海灣者留有後患，所以唔使驚銀河會主守。
丹普西馬田斯入球停不了

銀河前線由星級球員當路雲同羅比堅尼擔大旗，海灣者亦唔輸蝕，有丹普西加馬田斯呢對黑白雙煞，佢兩個都喺歐洲球壇威過吓，丹普西有技術兼把握力強，喺常規賽入咗十五球；馬田斯則有速度，嚟到級數較低嘅美職，只要交出正常水準都已經玩晒，常規賽入球數仲畀丹普西多兩球。海灣者有佢兩個在陣，唔怕搵唔到作客入球，大盤值得捧場。