馬賽主場打爭氣波 作客三連敗失榜首

猪拉多纳

今日阿King重心放喺法甲賽事，馬賽上輪於國家打吡落敗，榜首位置已被前晚贏波嘅聖日耳門取代，為搶回爭標主動，今於主場迎戰波爾多不容再失，憑球隊主場聯賽五連勝強勢，1.52倍主Ｗ可作過關重心。

（TVB 302周一凌晨4時直播）

連同盃賽在內，馬賽對上四場比賽輸三場，教練比爾沙接受訪問時亦承認球隊近況麻麻，好彩呢三場輸波都係作客賽事，而且對手分別係里昂、雷恩及聖日耳門等實力分子，應該唔會動搖到球員信心。事實上馬賽自從首場主場聯賽不敵蒙彼利埃之後，主場聯賽已經連贏五場，加埋總共入咗十三球，攻力有保證。

波爾多季初表現不俗，可惜球隊作客演出欠穩定，除咗輸過畀聖日耳門及打和聖伊天等前列球隊，對住蘭斯、甘岡等中下游隊伍亦輸波收場，佢哋對上六次聯賽作客馬賽只得三和三負，往績缺乏支持，一於信馬賽贏波開主Ｗ。
平手盤南特有「聖」算

另外兩場法甲賽事，南特連盃賽在內已保持九場不敗，表現硬淨，聖伊天中場伊斯美迪奧文迪停賽，哥尼特、哥夏迪及辛特麥斯明亦有傷在身，影響了中場兵源調動，平手盤捧主隊南特。蒙彼利埃主場鬥圖盧茲，圖盧茲一對進攻拍檔賓耶達、阿歷山大比錫近期弗到漏，有力喺近五場輸四場嘅蒙彼利埃身上搶分，揀讓球客勝。

（TVB 302周一凌晨零時直播）