AC變身o趙國米 恩沙基要攞威

猪拉多纳

打吡型帥對決

意甲「米蘭打吡戰」今晚勁爆上演！AC米蘭喺聖西路對國際米蘭，平手博得過。雖然AC今季場場變陣，表現比較飄忽，但教練恩沙基賽前話要做「米蘭費格遜」，教足27年，呢場梗係要贏波省招牌，對家國米請番文仙尼領軍無耐，唔值得睇太高。\

（TVB301周一凌晨3:45直播）

恩沙基今季帶領AC得4勝5和2負，表現唔算突出，但意大利傳媒發現，佢喺11場聯賽當中，用過10套正選陣容，不斷換人微調希望搵到最佳排陣，球迷應該畀啲耐性至係。事實上，最近恩沙基已經成功令本田圭佑同艾沙拉維翻生，話唔埋，費蘭度托利斯今場後備亮相，踢得仲好有波入呀！
AC蒙杜利禾 迪莊有望復出

當然AC今季攻強守弱，呢場仲有後衞邦利拿停賽，但好消息係，隊長蒙杜利禾同中場尼祖迪莊傷勢好轉，有可能趕及康復落場搏殺，意味恩沙基有更多籌碼排個靚陣。賽前佢仲話，希望好似費爵爺執教曼聯咁樣，長期擔任紅黑兵團主帥，講得咁口響，首次領軍踢打吡戰點衰得先？
國米文仙尼接手未摸熟

事實上，國米嘅情況都唔好得幾多，佢哋喺聯賽得4勝4和3負，教練馬沙利被炒後，文仙尼落實回歸唔夠一星期，雖然班主托希爾承諾畀時間佢執靚隊波，又話對呢位型帥好有信心，不過文帥就連助教都未請到，想嗌佩奧爾幫手又被拒絕，邊夠時間研究國米嘅陣容？加上中場加利美度坐波監，被迫變陣更加信唔過，旨意文仙尼做救世主，唔係太有說服力，捧AC好過。
Data King：AC連續8場聯賽入波

‧兩隊連續4次對賽開入球細。

‧AC連續8場聯賽有波入。

‧文仙尼以往執教國米，得勝率有61.95%。
乜都玩錦囊：國米旺半場細要熱捧

「米蘭打吡戰」已經連續4場開入球細，而且國際米蘭喺近7仗，先後有6次開半場細，唯一例外係上場以2:2打和維羅納，半場踢成1:1。即使文仙尼回歸執教，睇怕都好難改變佢哋慢熱嘅風格，如果唔想捧AC，就熱捧1.36倍半場細啦！