修咸頓強勢添食

猪拉多纳

維拉陷「嚴冬」冇厘神氣

英超獨腳戲，弗到漏嘅「聖人」修咸頓作客阿士東維拉，「聖人」愈踢愈順，連盃賽在內，近12仗獲11勝佳績，絕非虛火。球隊開始心雄，進軍歐聯唔再係幻想，甚至有問鼎聯賽冠軍嘅目標，每場都會搏盡。反觀維拉冇厘神氣，主場都3連敗，仲有射手賓迪基停賽，難有還擊之力，簡單要客Ｗ。

（now 621周二凌晨4時直播）

季初你問球迷最唔睇好邊支英超球隊時，相信好多人都揀修咸頓，事關佢哋畀列強拆骨咁滯，上季主力走得七七八八，點知由荷蘭名宿朗奴高文執教下，居然踢出「全能足球」風範，防守穩健，反擊高效率，中前場進攻點夠多，射手加斯安奴柏利唔止個人把握力強，亦充分發揮柱躉式中鋒功能，經常二傳為隊友創造機會，中場沙迪奧文尼、雲耶馬，甚至後衞積克確克有更多攻門機會，令對手防不勝防。

現時位居次席嘅修咸頓難得創出佳績，會方準備食住個勢大搞，計劃1月增兵，包括回購利物浦前鋒列基林拔、買斯洛文尼亞國腳甘比爾等，爭下屆歐聯入場券決心非常大。球會肯投資，球員自然更多心機比賽，修咸頓應可保持強勢。
維拉近７仗入得一粒

至於阿士東維拉剛好相反，近7仗輸足6仗，已經跌到落聯賽榜下游位置，最弊只入得1球，射手賓迪基繼續坐波監，更加難翻身。球隊陷入「嚴冬」，講得衰啲似乎等緊領隊林拔幾時被炒，重新來過，實在冇得同如日方中嘅修咸頓抗衡。