曼城無路可退 大衞撼巨仁

猪拉多纳

和都唔掂喪攻搶W！

生死激戰、唔搏唔掂！歐聯E組今晚上演超級重頭戲，曼城主場迎戰拜仁慕尼黑！對4戰得2分、小組包艇嘅曼城嚟講，絕對係一場生死戰，想進身淘汰賽，「藍月亮」無路可退，今戰對手即使係「宇宙最強」拜仁，都焗住喪攻、非勝不可！反之「巨仁」4戰豪取12分，經已提早出線，不過主帥哥迪奧拿係完美主義者，今晚放軟手腳機會好微，一隊要搏，另一隊又咁勁，1.62倍入球大當然係投X首選啦！

（有線61及201、中央5台周三凌晨3:45直播）

曼城近7戰僅錄得2勝2和3負，成績咁鬼曳，最主要原因就係佢哋條防線極度不穩。之但係，「藍月亮」雖然狀態稱唔上弗，但佢哋嘅鋒力始終冇退步到，曼城除咗喺英格蘭聯賽盃收起主力嗰場波食白果，其餘13戰例必有波入，都咪話唔得人驚！
耶耶停賽 施華養傷 拿斯尼 林伯一樣掂

係，「藍月亮」中場耶耶托尼上仗歐聯領紅今晚需要停賽、大衞施華又養緊傷，但好彩，佢哋仲有拿斯尼同林柏特等進攻好手領軍，前線祖維迪、阿古路又會紮住搏殺，呢個「大衞」絕對夠晒本錢挑戰「巨仁」！
贏4粒哥帥照插 拜仁眾將唔敢再Hea

仲有一點，係形勢上「藍月亮」今鋪係和都唔掂，呢場波佢哋已經無路可退，斷唔會坐以待斃，正因為咁，曼城主帥比歷連尼已經擺大個頭，實行踢類似424陣式，搏命搶攻保住出線資格。

對家拜仁慕尼黑狀態弗到冇朋友，喺德甲一枝獨秀之餘，更係四大聯賽少有嘅不敗之師。「巨仁」喺上輪聯賽大勝賀芬咸4:0，不過教練哥迪奧拿依然唔滿意，話隊波入局太慢喎，要求咁高，班手足又點敢放軟手腳先？中場大將舒韋恩史迪加上仗已經復出，今晚極有機會披甲校炮，為前面嘅羅拔利雲度夫斯基、湯馬士梅拿同馬里奧葛斯提供彈藥，雙方都咁有火，今晚一於等睇入球騷啦！
歐聯E組：盤路解碼

曼城今季踢咗19場比賽開咗11口入球大，比例為58%。
Data King：曼城14次鬥德軍取5勝

‧雙方近6次交手，拜仁取得4勝2負。

‧連各項賽事在內，拜仁今季仲未輸過。

‧曼城歷嚟14次對戰德國球隊，取得5勝2和7負成績。