黑仔蜜蜂焗留力 益晒阿仙奴

猪拉多纳

列奧斯打柴 股價跌2.36%

阿仙奴今晚喺主場迎戰歐聯D組對手多蒙特，「兵工廠」目前手握7分位居次席，拋甩排第3位嘅安德列治5分，今晚只要贏波就可以進身16強，淨係呢份決心都抵撐！最重要係「蜜蜂兵」已提早出線，今鋪隨時留力，就當多蒙特肯搏，但呢班波近排黑到爆兼傷兵滿營，根本冇能力阻阿仙奴開W，一於捧2.3倍主勝！（有線61及201周四凌晨3:45直播）

阿仙奴上星期六對曼聯，大部分時間控制戰局，奈何後衞基蘭基比斯一記烏龍波輸壞個頭，「廠仔」最終喺主場以1:2倒灶，陰功到爆！冇錯，中場韋舒亞喺「仙魔戰」傷出，今戰唔使預佢，但查實呢位英格蘭國腳近期表現跌Watt，領隊雲格用番辛迪卡索拉擔正，組織攻勢可能更加入肉！

PA山韋碧克狀態好 鋒力靠得住

另一件主力基奧特，喺上仗復出即刻有「士哥」，不過阿仙奴估唔到佢咁快好番，所以冇喺歐聯分組賽階段幫呢位法國前鋒註冊，意味住佢今晚只可以做觀眾，不過唔使怕嘅，事關「兵工廠」其餘兩件進攻好手韋碧克同阿歷斯山齊士狀態唔錯，絕對夠晒火力撕破多蒙特防線。

「蜜蜂兵團」今季喺德甲頭頭碰着黑，經常由贏變和，和就變輸，聯賽跌到落尾三，最黑仔係「男神」馬高列奧斯又打柴，最快要到2015年先可以復出，搞到球會股價亦因而急挫2.36%，運滯到得人驚！球會總經理華斯基焗住出面打氣，賽前引用英國前首相邱吉爾名句「Into the Storm」嚟激勵士氣，叫班「蜜蜂兵」要逆境自強喎！
艾芬保寸多蒙特：嚇走買家仲好！

可惜吖，列奧斯堅唔爭氣，近4年傷足19次，前拜仁名將艾芬保寸寸貢話多蒙特因禍得福，皆因列奧斯玻璃成咁，肯定嚇窒唔少潛在買家喎，擺明攞景！但畀人寸爆都冇計o架，鬼叫你黑咩！畀着我係高普，今晚一定落柯打留力，喺禮拜一凌晨回師德甲砌低法蘭克福好過！咁嘅環境，梗係撐阿仙奴啦！
歐聯D組：盤路解碼

阿仙奴近10仗歐聯分組賽贏6場，得勝率達60%。
Data King：兩軍對賽旺開半和

‧阿仙奴15次主場迎戰德國球隊，取得9勝1和5負。

‧兵工廠主場鬥多蒙特連開3口半場和。

‧阿仙奴今季主場出擊場場有「士哥」。