利記沉爆讓唔起盧多格德斯

猪拉多纳

利物浦今季表現唔掂，近期仲連輸4場添，今晚紅軍造訪盧多格德斯，贏面唔高，事關利記雖然喺B組首戰主場擊敗過呢支保加利亞勁旅，但贏得辛苦，今鋪狀態咁沉仲要作客，梗係捧盧軍1.92倍「讓主」！（有線64及203周四凌晨3:45直播）

利物浦上仗畀水晶宮打殘，球迷已經對領隊羅渣士冇晒信心，日前有傳會方打算搵多蒙特教練高普，去取代羅帥。係，現階段嘅紅軍，的確好需要贏番場波去冧球迷，問題在於鋒力疲弱，真係好難一時三刻解決到。雖然巴洛迪利日前已經復操，有望喺今仗上陣，但呢位意大利國腳根本融入唔到利記，好難令人相信佢可以攻破盧多格德斯大門。

另邊廂，盧多格德斯雖因得失球差喺B組墊底，但今晚佢哋有後防主將明尼夫復出，尤其係呢班波喺分組賽首戰對紅軍，其實係踢得有板有眼，今鋪地頭出擊有得受讓，博得過吖。
歐聯B組