西維爾作客腳軟捧唔諾

猪拉多纳

歐霸盃分組賽踢到倒數第2輪，衞冕嘅西維爾喺G組手執8分，今場贏波就出硬線，弊在佢哋患上「歐霸作客恐懼症」，每當離開自己地頭就唔識贏，今晚遠征荷蘭遇着主場贏到開巷嘅飛燕諾，試問仲邊讓得起平半，梗係捧飛燕諾1.78倍下盤好過！

（有線63周五凌晨2:00直播）

雖則西維爾係衞冕冠軍，家陣又排喺小組榜首，實情佢哋喺歐霸盃作客戰績都幾曳，上屆8強火併波圖同4強硬撼華倫西亞，兩場作客輸晒唔在講，今屆分組賽造訪列積卡同標準列治亦都贏唔到，加上幾日前被巴塞隆拿炒鑊甘，嚴重打擊球員士氣，今場就算能夠排個靚陣出戰都信唔過。
飛燕諾主場6連勝

對手飛燕諾現時揸住6分喺手緊守次席，但如果今場冇分落袋嘅話，隨時被列積卡或者標準列治爬過頭，令出線形勢變得被動。再者佢哋喺歐霸盃分組賽兩輪主場全勝、兩輪作客全敗，擺到明靠主場搵食，今輪係佢哋最後一次喺分組賽主場出戰，唔搏殺搶分等幾時？

而且飛燕諾經過季初低潮後已經重回正軌，近10場贏8場不特止，歐霸連荷甲更打出一段主場6連勝氣勢，每場最低限度都入兩粒，當中恩馬斯、史雲雲碧克、保爾迪斯同艾維斯文奴都有士哥，即使後者因為腹股溝受傷缺陣，但攻擊點咁多，唔使怕冇入波，今場穩陣揀下盤，進取嘅直取主勝都仲得！

歐霸盃G組