榜尾史特加 難敵弗賴堡

猪拉多纳

不停洗牌 虛耗光陰

德甲獨腳戲弗賴堡主場對史特加，呢場既係南部嘅巴登符騰堡州打吡，亦係護級前哨戰，淪落榜尾嘅史特加啱啱換帥，不過新官上任未必立即可以點起三把火；相反弗賴堡擺明小本經營，一直全力支持務實教練施特拉希，今晚打吡戰，愈戰愈勇嘅弗賴堡主場小讓平半，黑柴撐上盤。

（有線61及201台周六凌晨3時30分直播）

史特加07年僥倖奪冠後，毫無遠見同耐性嘅高層管理不善，既冇雄心同財力大事增兵，亦因為缺乏耐性，浪費大量時間金錢喺換帥度，上季季前至決定支持少帥湯馬士舒尼達，但去到今年三月球隊位列尾二，於是急急搵「救火專家」史堤芬斯救亡，佢最後驚險幫史特加護級成功，但高層今夏又決定搵番七年前奪冠功臣艾明費執教，換帥後成績同表現毫無起色，九月又決定人事變動，炒咗球會忠臣體育總監波碧，但係都救唔番隊波，直至上仗主場不敵奧格斯堡跌至榜尾，只教得四個幾月嘅艾明費又冇得番低，高層臨急搵番史堤芬斯救亡，一年內三度換帥，淨係洗牌都洗到班球員「陀陀擰」啦！
傷停滿營 新帥要時間執

弗賴堡靠務實有料嘅施特拉希提拔新人，踢起咗季尾即賣套現，施特拉希每季都幾乎要從頭做起，但球會對佢嘅支持令佢可以安心工作，季前又一次大失血嘅弗賴堡近期果然又畀施特拉希執掂，近三場聯賽兩勝一和，計埋上月尾德國盃大炒1860慕尼黑，近一個月戰績醒過好多名牌勁旅，佢晨早將目標指向今仗，唔似得史堤芬斯咁臨急抱佛腳。何況弗賴堡可強陣出擊，但史特加傷停問題嚴重，除兩大箭頭伊比斯域同艾度拿奧爾養傷外，兩位史堤芬斯上季愛將尼達美亞同迪戴維都繼續因傷缺陣，加上今季主力後衞舒華比同中場奧利奧爾羅美奧雙雙停賽，史堤芬斯拎住手牌天殘地缺，今晚都幾難立即轉弱為強咯！