大阪飛腳 勝利在望

猪拉多纳

愈贏愈有力爭三冠

日職進入最後兩輪秩序，大阪飛腳上周末於榜首大戰擊敗浦和紅鑽，將彼此距離縮窄至兩分重燃奪標希望，飛腳季尾並冇因為兼顧多條戰線而表現跌Watt，反而一鼓作氣愈贏愈有，為向三冠王霸業邁進，今於主場迎戰冇嘢好爭嘅神戶勝利船勝券在握，捧讓球主勝。

（有線62及202台周六下午1時直播）

飛腳喺十一月份進行咗三場重要戰役，先喺月初日聯盃決賽擊敗廣島三箭贏得冠軍，周中日皇盃4強又以5比2大炒清水心跳殺入決賽，最重要而難打嘅一仗係喺上周末聯賽作客以2比0擊敗爭標對手紅鑽，追至落後紅鑽兩分，由於佢哋暫時得失球差較佳，最後一輪又係對住已經篤定降班嘅包尾大幡德島漩渦，只要贏晒餘下兩場而同時間紅鑽失分，飛腳大有機會後來追上奪標，從以上多場關鍵戰役所見，飛腳表現冇受體力影響，憑高昂戰意可以搏到收咧。

連盃賽在內，神戶勝利船今季三鬥飛腳一和兩負，其中聯賽首循環輸一比五，日聯盃八強次回合作客亦淨吞三蛋，實力明顯不及對手，而且佢哋對上八場聯賽只得一勝，面對包尾大幡德島漩渦都贏唔到，有報道指球會換帥在即，球員無心戀戰可以理解，面對志切爭標嘅飛腳好大機會再輸一場。
鳥棲砂岩無懼浦和紅鑽

另一支爭標主角浦和紅鑽同時間會作客排第四嘅鳥棲砂岩，紅鑽季尾表現嚴重跌Watt，對上五場聯賽只得一勝，包括之前所講喺關鍵戰輸畀飛腳，士氣受挫。鳥棲砂岩最近三次迎戰紅鑽未輸過，而且仲有機會爭入前三參加來季亞冠盃，紅鑽讓平半必捧下盤。

（有線61及201台周六下午1時直播）