歐霸後遺症 熱刺難啃拖肥糖

猪拉多纳

兩支剛喺歐霸盃分組賽贏波出線嘅英超球隊回師本土戰場交鋒，熱刺會喺主場迎戰愛華頓。熱刺今屆踢完歐霸盃分組賽後，回師聯賽都係踢主場，但戰績就認真麻麻，加上周中快車期仲要作客鬥車路士，球員難免會分心，面對近8仗未輸過嘅愛華頓，根本冇把握贏波，阿謙捧讓球客勝。

（now 621周一凌晨零時直播）

熱刺剛喺歐霸盃分組賽主場以1比0小勝柏迪遜提早出線，但球隊今屆每次踢完歐霸盃後嘅聯賽都交唔到貨，對上4次踢完分組賽後咁啱都係回師主場出擊，只錄得1勝3負，而且對手都只係中下游球隊，難怪連主帥普捷天奴都話可能係受到歐霸盃賽程影響，球隊周日嘅英超賽事成績明顯較差，因此希望賽會安排讓佢哋可以周一晚至踢。熱刺今仗有後衞丹尼路斯、卡保奧及基爾獲加因傷倦勤，基爾洛頓則因停賽無法上陣，加上周中仲要作客鬥車路士，一眾球員難免會有所分心，今仗要贏波絕非易事。
愛華頓近8仗不敗

愛華頓日前歐霸盃分組賽作客以2比0擊敗禾夫斯堡，同樣提早出線，球隊已經連續8場賽事未輸過狀態相當唔錯。「拖肥糖」雖仍有中場占士麥卡菲及吉遜、後衞史東斯、艾卡拉斯及白賴仁奧維度因傷無法上陣，但前線主將盧卡古、伊度奧同米拿拉斯近況皆甚弗，今仗面對有多名後防主將缺陣嘅熱刺，有能力攻破對手大門，阿謙睇好作客嘅愛華頓可以全身而退，讓球客勝捧得過。