聖伊天死火 鬥里唔過

猪拉多纳

成日話，進攻就係最佳防守，咁如果攻擊力弱防守又一般嘅話就真係好弊，法甲嘅聖伊天就面對呢個情況，今周打吡戰迎戰火力驚人嘅里昂，好擔心佢哋入唔到波之餘，仲隨時3分盡失。

（TVB302周一凌晨4:00直播）

聖伊天鋒力確係曳，翻查今季戰績，計埋歐霸盃得兩場入多過1球，14場法甲只攻入13球，睇吓對面里昂啦，單係法國射手拿卡錫迪一個人都轟入11粒，望番聖伊天陣容又無計嘅，土耳其前鋒艾丁仍然養傷，荷蘭箭頭雲禾夫斯雲高亦非多產射手，最叻仔嘅翼鋒麥斯格拉度亦只得3球進帳，試問仲可以靠邊個數胡呢？另外，聖伊天亦要兼顧歐霸盃，啱啱周中先同阿塞拜疆嘅卡拉巴克踢成1:1，喺各項賽事已連和5場，好耐未試過贏波滋味，體力消耗亦較大，小弟當然睇淡佢哋。
里昂拿卡錫迪專剋對手

論火力，里昂贏足一條街，14場累積27球，係聖伊天一倍有多，講近況，佢哋10場不敗，亦唔使踢歐洲賽以逸待勞，拿卡錫迪上季兩循環對聖伊天都有波入，名副其實係對方剋星，綜合各方面嚟睇，里昂有優勢，但哥古夫缺陣下，中場創造力始終爭啲，上場摸和巴斯蒂亞0:0就反映出呢點，慶幸菲傑波監期滿復出，如果用番佐敦費利踢正選亦可增強活力，到時拿卡錫迪嘅發揮可能仲好。上季大家都喺對方地頭贏2:1，到底歷史會否重演，里昂作客再奏凱歌呢？