華歷簡奴 好心有好報

猪拉多纳

貝爾奴復甦 唔赦艾美利亞

今輪西甲壓軸上演中下游對決，由艾美利亞主場迎戰華歷簡奴。華歷簡奴不但喺前鋒貝爾奴重拾射門鞋下止住頹勢，近日更做善事義助八旬婦，對住之前6場未贏過嘅艾美利亞，隨時好心有好報，仲有得受讓咁筍，斯維力撐華軍讓球客勝。

（周二凌晨3時45分開賽）

斯維一直跟開西甲，最初因為米捷喺11-12年度球季大爆發而留意華歷簡奴，後來佢轉投史雲斯，呢班波雖跌跌碰碰但仍堅持打控球戰術，就算大敗畀巴塞都贏控球率，令人留下深刻印象。之前有3季處於破產保護期嘅華歷簡奴被稱為「免簽狂魔」，據報近8年佢哋唔使轉會費簽入嘅球員多達101人，包括靠友會「賒借」來投嘅巴迪斯達奧、查維亞阿基路、卡古達等，拉雜成軍下年年護級成功算係咁喇。
幫助85歲婆婆安享晚年

華歷簡奴今季開咧表現麻麻，好彩前幾場陷入球荒嘅前鋒貝爾奴，近兩仗都有士哥，上場對切爾達更一箭定江山。

除咗止住頹勢外，華歷簡奴亦堅有愛心，一名住喺馬德里市嘅85歲老婆婆馬天妮絲，早前為幫爛賭兒子還債而畀銀行收樓，搞到無家可歸，華軍上下得知此事後，決定負擔馬天妮絲往後日子租屋住嘅全部租金，希望佢可安享晚年。喺西班牙經濟不景氣、家家自掃門前雪嘅情形下，華歷簡奴卻不忘負起社會負任，真係人間有情。

另一邊廂，艾美利亞雖於上仗打和終止4連敗，但近6場未贏過狀態曳爆，今仗有中場主力拉蒙阿施斯坐波監，華沙及哥朗拿亦因傷缺陣，個陣天殘地缺，就算有主場之利都唔幫得幾多，況且上季兩度交手華歷簡奴贏晒，仲有得受讓梗係揀讓球客勝喇。