曼城細畀黑貓纏

猪拉多纳

曼城到訪光明球場變「黑仔」，呢支富貴兵團過去4次作客「黑貓」新特蘭，都以0比1敗陣而回，唔到你唔信邪。「黑貓」主帥普耶近期大施「守」術，強如車路士亦要食白果，曼城經過連場惡戰之後，難免有疲態，要攻陷新特蘭鐵桶陣絕非易事，客W1.38倍高風險、低回報，建議揀選2.1倍入球細。

（now 623周四凌晨3時45分直播）
新特蘭「大巴陣」有睇頭

新特蘭領隊普耶上仗鬥車仔擺出「大巴陣」，一對防守中場卡達莫、魯迪維爾相當爛打，中堅奧沙、布朗經驗豐富，補位準繩，令車仔老鼠拉龜，迪亞高哥斯達因而踢到躁，多次犯規，仲攞埋黃牌，可見「黑貓」防守有幾嚴密。今仗鬥曼城，普耶可以照辦煮碗，堅守城池，阿古路等曼城球星未必佔到甜頭。

曼城喺歐聯擊敗拜仁慕尼黑，跟住又大勝修咸頓，連贏兩場關鍵大戰，的確可以大振軍心，但同時亦因為連場惡鬥，消耗大量體力，今仗遇上實力較弱嘅新特蘭，球員心態上或會較放鬆，主帥比歷連尼甚至可能畀部分主力休息亦唔奇，唔好期望曼城再大勝一仗。值得一提，曼城過去5次作客新特蘭，竟然得1和4負，只入1球，呢5場都開細盤，絕對唔易踢，寧願追入球細。