PSG疲兵表現曳 里爾2.2倍「讓主」有計

猪拉多纳

周三法甲快車壓軸戲碼，有里爾主場迎戰巴黎聖日耳門。里爾近期戰績曳到爆，同頻密作客賽程不無關係，今輪終於返到主場出戰，仲有三員防線猛將坐完波監復出，要頂住疲兵出戰嘅PSG絕非天方夜譚，受讓揀2.2倍「讓球主勝」啱數。

（now714台、TVB302周四凌晨4:00直播）
里爾3守將坐完波監

里爾喺歐霸盃同法甲近10場僅得4和6負，戰績認真唔掂，但當中只得3場喺主場出戰不特止，最近4場都要踢作客波，都咪話唔惡啃。事實上，里爾主場演出相當對辦，近8場只輸過1場，其餘7戰取得3勝4和，加上今場有比尼亞、哥捷亞同蘇亞尼幾名後防主將坐完波監復出，有條件頂得住PSG嘅攻勢。

PSG雖然今季仲未輸過，現時更正值9連勝強勢，但佢哋喺法甲同歐聯雙線發展密密踢，隊長堤亞高施華大呻攰到嘔不特止，上輪鬥尼斯只靠伊巴謙莫域射入12碼奠勝，就連主帥白蘭斯賽後都承認踢得比對手差，贏波欠缺說服力，今場聯賽快車仲要作客出戰，連勝氣勢斷纜唔出奇。