鹿島鹿角 強勢停不鳥

猪拉多纳

日職聽日煞科，最後一輪九場賽事同時喺下晝兩點半開波，當中鹿島鹿角近況大勇，主場炒得起殘陣兼失去奮鬥目標嘅鳥棲砂岩，鹿角上盤甚至讓球主勝都係出擊重心。

（有線18台周六下午2時30分直播）

榜首三強大阪飛腳、浦和紅鑽同鹿島鹿角分途出擊，形勢上都有爭霸機會，所以三場都有直播。不過飛腳目前以七個得失球差優勢壓倒紅鑽，最後一輪對手只係篤定包尾降班嘅魚腩德島漩渦（有線61及201台周六下午2時30分直播），基本上已經手執盃耳，難怪奪標賠率熱到得番1.08倍。不過紅鑽同鹿角都聲言唔會放棄喺主場瞓身一搏。

鹿角目前排第三，落後飛腳同紅鑽兩分，今場最少要贏砂岩兩球或以上，然後再望榜首雙雄齊齊失分至可以奪標，真係要指望奇迹。不過對於呢支曾經七奪冠軍嘅日職最成功球隊，喺過去四屆都無緣染指冠軍，今次無論如何都唔會放棄。球隊近期三連勝共入八球，即使有射手達維長抖，中場卡奧盧卡斯停賽，仍擁有遠藤康、赤崎秀平、土居聖真同柴崎岳等狀態大勇嘅攻擊群，主場謝幕實搏甩髀。
舜文現場直擊紅鑽

砂岩上仗賽和紅鑽變咗兩敗俱傷，目前排第四位落後鹿角三分，但得失球差落後達十九球，除非今仗能大勝鹿角十球或以上，否則都無緣下屆亞冠盃入場券，機會名存實亡，何況砂岩今仗痛失三大主力，中堅菊地直哉同中場藤田直之雙雙停賽，另一中場岡本知剛上仗傷出證實要養傷四周。砂岩今季已同鹿角兩度交鋒，聯賽首循環主場吞三蛋，日聯盃作客亦輸1比3，明午亦難逃被大炒厄運。

至於浦和紅鑽主場對名古屋鯨魚（有線64及203台周六下午2時30分直播），有線評述員兼本報名家劉舜文將會現場同大家報道，不過紅鑽近期黑過墨斗，接連喺比賽尾段遭絕殺，遇上冇包袱嘅鯨魚都係忍手為宜。