銀河搶冠 送別當路雲

猪拉多纳

革命天生「二奶命」

美職季後賽周一凌晨上演總決賽，西岸冠軍洛杉磯銀河主場鬥東岸冠軍新英倫革命。新英倫革命天生「二奶命」，過去四次打入總決賽都落敗收場。洛杉磯銀河除有新鮮出爐嘅常規賽MVP羅比堅尼掛帥，今場亦係一代名將當路雲職業生涯告別戰，球隊上下一定拚盡，主隊讓一球捧上盤。

（周一凌晨4時開賽、馬會網上文字直播）

今屆總決賽可以講係最佳對最差，銀河除九度亮相總決賽係史上最多，四次捧盃亦同華盛頓聯隊並列奪標次數之冠，相反革命過去四次進身總決賽都係輸家，其中喺02年、05年正正輸畀今場對手銀河，可謂冤家路窄。
革命常規賽大敗畀銀河

革命今季常規賽輸波次數比無緣季後賽嘅東岸球隊費城聯、芝加哥火燄更多，而且佢哋季中一度經歷7連敗，包括以1比5大敗畀銀河，講穩定性遠遠不及常規賽輸波及失球數字都係最少嘅銀河。

銀河前鋒羅比堅尼剛當選常規賽MVP，另亦連同隊友奧馬干沙利斯及當路雲入選最佳陣容，今場係當路雲職業生涯告別戰，相信陣中球員相信唔會腳軟，主隊讓一球捧上盤。