森多撳住砌追打維羅納

猪拉多纳

好多足球員掛靴後都會執起教鞭，繼續喺球壇發展，但咪以為球員時代擔任前鋒嘅主帥，就一定主張進攻足球；踢開後衞嘅教頭，戰術思維就一定係保守。好似周二凌晨出場嘅森多利亞，佢哋嘅主帥米赫洛域雖然係後衞出身，喺佢帶領下嘅森多，卻係一支踢法進取嘅球隊。森多利亞今場喺意甲作客近7場聯賽未贏過嘅維羅納，有望攻陷對手，平手盤要森多﹗

（TVB 301周二凌晨4時直播）

米赫洛域不嬲都有料又有性格，佢上年11月先接手球隊，即刻令備受降班威脅嘅森多安然度過上個球季，到今季更係大躍進，聯賽頭8戰保持不敗，現以22分排喺第5位，呢排成績睇落有啲下滑，近7場聯賽僅得1勝，但對手包括羅馬、拿玻里、AC米蘭、國際米蘭，話晒都係名牌球隊，森多贏唔到實在情有可原，今場對住狀態更差嘅維羅納，有望重響勝鼓。
卡利亞里基爾禾獻「細」

另一場較早時間開波嘅意甲賽事，卡利亞里主場對基爾禾，主隊有前鋒馬高沙奧缺陣，基爾禾亦有翼鋒艾斯基舒希洛圖無法候命，加上兩軍近六次碰頭均少交收，今場捧細啱數。最後到葡超賽事，國民隊主場迎戰馬里迪莫，國民隊近3仗不勝，捧對家讓球客勝啱數。