紅軍生死戰 拆大巴出線

猪拉多纳

神奇隊長重演10年前經典？

依家喺歐聯B組排第3嘅利物浦，今晚深夜迎戰第2位嘅巴素利，「紅軍」為出線，冇得傾，一定要贏！好彩呢支05年冠軍近期狀態回勇，連帶備受批評嘅「神奇隊長」謝拉特表現都有起色，見慣大場面嘅佢今場隨時再做「關鍵先生」，配合「隊長」嗰班喪攻隊友，鋒力可靠，我睇好「利記」可以拆大「巴」出線，捧1.58倍主勝！

（有線61及201周三凌晨3:45直播）

利物浦今季重返歐聯戰場，原本被外界一致睇好可以輕鬆同皇家馬德里齊齊出線，點知「紅軍」落到場全無霸氣，如果唔係上輪分組賽已經出線嘅皇馬幫手，砌低巴素利，「紅軍」一早執咗包袱！好在，依家利物浦雖然落後巴素利2分，但只要今晚砌低對手，就可以獲得次名出線資格，機會咁難得，利物浦梗係要好好把握啦！
04年絕地反擊 謝四建功捧歐聯

查實「紅軍」教頭羅渣士，最近收起巴洛迪利改用列基林拔，的確係改善咗隊波嘅進攻流暢度，況且傳聞會喺一月離隊嘅謝拉特，近期大踢爭氣波，表現全面回勇！咁啱得咁蹺，「利記」對上一次喺歐聯分組賽最後一輪踢生死戰，就係10年前（2004年）對奧林比亞高斯！當時「紅軍」就係由謝拉特入波反勝3:1出線，最後仲砌低AC米蘭攞埋當屆冠軍添！謝拉特再次成為「紅軍」救世主，相信係唔少「利迷」想見多次嘅動人畫面。
巴素利作客例腳軟

咁又講真，作客嘅巴素利實力唔差，只可惜佢哋向來都踢慣進攻足球，今場反而作客攞1分都可以出線，教頭保羅蘇沙又話要玩大巴戰術，隨時搞到班球員進退失據。唔好忘記一點，就係巴素利作客成績勁差，之前呢支瑞士球隊去到巴拿貝，畀皇馬勁炒5:1，造訪保加利亞嘅盧多格德斯都要輸1粒，今晚去到晏菲路，再輸都好正路吖！
Data King：紅軍22戰13次開大

‧利物浦歷來11次迎戰瑞士波，共錄6勝3和2負。

‧紅軍今季22戰，總共開出13口入球大。

‧巴素利23次鬥英格蘭球隊，錄6勝7和10負。
盤路解碼：利物浦近5次主場迎戰瑞士球隊獲3勝2和，贏盤率60%。

歐聯B組

頂占筍盤：利物浦（主勝）

有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「球彩直播室」：周三凌晨3:15至早上5:45