PAOK孤注一擲贏得甘

猪拉多纳

K組賽事，希臘PAOK主場迎戰法甲甘岡，兩軍現時同得七分，由於甘岡主場曾以2比0擊敗PAOK，如果今場打和大家同分，甘岡將可憑較佳對賽成績取得次名出線，故此PAOK今仗許勝不許和，波童捧1.7倍主W。

（有線63台周五凌晨4時05分直播）

PAOK係近年歐霸盃常客，對上四屆有三次打入分組賽，而且全部都能取得出線權，經驗滿瀉，其中特別要留意前鋒阿芬拿斯亞迪斯，呢位希臘國腳今屆歐霸盃已入五球，同時以十六球成為球會歷來喺歐洲賽入波最多嘅球員，射術一流，佢同拍檔羅拔馬克及法古度佩雷拉喺今季希超加埋入咗十九球，堪稱進攻鐵三角，為出線勢必向客軍狂開炮。
甘岡欠攻力未夠班

甘岡近期聯賽表現雖然有改善，但去到歐洲賽畀人感覺似乎仲未夠班，佢哋今屆兩場作客先後輸畀費倫天拿打和弱旅明斯克戴拿模，而且兩場比賽都冇入波，難有反撲之力，一於捧求勝決心十足嘅PAOK可以贏波出線。