歐聯16強唔使咁早講

猪拉多纳

歐聯16強塵埃落定，好多球評家已急不及待，開始預測邊隊會攞冠軍，暫時拜仁及衞冕嘅皇馬以近4倍為奪標大熱，但Peter覺得言之過早。一來下周一先抽籤，佢哋下圈會對邊隊都未知，二來其他資深教練會趁住明年一月轉會窗重開添兵，彌補陣容上嘅不足，加上球員會有不可預知嘅傷病、狀態起伏嘅情況，依家就話邊隊封王都係講啫，又唔使死，不過Peter寧願唔講。
曼城獵狐冇難度

Peter成日強調，主帥喺呢項咁高水平嘅賽事對球隊好重要，好似莫連奴、安察洛堤、哥迪奧拿等教頭最識諗計，預料佢哋領導嘅車路士、皇馬及拜仁，要過兩關躋身4強嘅把握會高啲，待抽籤完畢後再深入淺出同大家分析吓，邊隊今屆有機會殺入決賽喇！

講番今晚英超，雖然曼城近期勁多傷兵，但勝在兵源足，正好畀機會之前冇得踢嘅迪斯高、拿斯尼等發威，Peter認為「藍月亮」只要有鬥志及飢渴感，絕對唔赦任何對手，何況今仗只係作客弱旅「狐狸」李斯特城，相信佢哋會延續佳態，擸晒3分。

（now 622周六晚11時直播）
金句：歐聯籤未抽人未添，何來展望預測冇咁早