競賽會爭標有優細

猪拉多纳

阿甲聽朝誕生冠軍！手裏面揸住兩分優勢嘅競賽會，只要喺主場擊敗葛度爾古斯，就可以壓倒河床登上王座，所以幾乎全人類，甚至佢哋自己都當正捧咗盃咁，嗰種壓力唔細o架，競賽會隨時只求贏波收工，1.83倍入球細諗得過。

（開賽時間：周一早上7:30）

競賽會聽朝會同河床分途出擊，後者作客基爾梅斯不但要贏，仲要希望競賽會輸波至掂。當然，競賽會和波嘅話，佢哋就要同河床整場附加賽決定冠軍誰屬，論形勢梗係競賽會着數晒。

正因為咁，競賽會居然獎盃都未落袋，就已經製作咗一件冠軍紀念波衫出嚟，如果臨尾香，呢個架真係丟得大喇。至弊係競賽會班Fans都當攞咗冠軍，有個球迷組織「The Corbatta」前日專登去到訓練基地，掛起幾條橫額多謝班球員同教練，尤其早排畀佢哋插到開花嘅龍門沙查，「獨霸」一條致謝橫額，成為咗人民英雄。响呢種氣氛下，競賽會今場贏唔到嘅話肯定大鑊，坐爆球場嘅5萬狂迷唔鬧事就奇嘞。何況今場波明明冇飛賣，但賽前有疑似假飛流出，仲炒到成2,700蚊港紙一張，買咗假波飛冇得入場嘅，假如知道愛隊衰咗，想唔暴動都難。

當然，承受住沉重壓力嘅競賽會，近6次主場出擊葛度爾古斯有5成勝率，而且全隊冇穿冇爛，絕對可以睇高半線。不過，葛度爾古斯都怕畀河床呢班Fans話佢哋打假波，已經講到明要搞寸競賽會個Party，加埋除咗列托拉唔掂，另一中場悍將荷西費南迪斯可以復出，佢哋即使輸都唔會大敗，入球細玩得過。