國米抖夠搏殺上盤有基

猪拉多纳

今晚受注賽事唔多，不過一樣有好嘢，意甲尾場直播國際米蘭作客鬥基爾禾。國米領隊文仙尼上場歐霸盃收起主力球員，擺明留力要喺基爾禾身上取得上任後首場聯賽勝仗。基爾禾近五仗不敗表現係唔錯，不過長路有盡時，今仗再捧大有追寶尾之感，國米小讓平半捧上盤。

（TVB 301周二凌晨4時直播）

自從文仙尼回歸國米後，球隊只在歐霸盃贏過迪尼普，三場聯賽先後打和ＡＣ米蘭及輸畀羅馬、烏甸尼斯。為留力意甲，文仙尼上周中喺穩奪歐霸盃出線權嘅情況下，派出副選出戰卡拉柏克，柏拉斯奧、高華錫、古亞連、長友佑都等主力全部冇隨隊，留在國內休養生息，文仙尼同球隊沉咗咁耐，都係時候要打場爭氣波。

基爾禾近五場不敗，聯賽榜爬升至十六位（未計周日晚成績），不過佢哋今場有一對防守主力尼高拉斯費爾及索卡洛域停賽，或多或少會對防線造成影響。從盤路分析，基爾禾連贏五場亦有追寶尾感覺，以國米實力絕對有權終止其不敗走勢，國米讓平半上盤博得過。
安玻里讓平半冇甩拖

另一場意甲由安玻里主場鬥拖連奴，拖連奴剛在歐霸盃大勝哥本哈根成功出線，開心過後球員要回氣。安玻里連盃賽近五場不敗，其中有三場保持不失，讓平半捧上盤。

（TVB 301周二凌晨2時直播）