聖羅倫素受高估揀細盤

猪拉多纳

今晚世冠盃上演另一場4強賽事，阿根廷球隊聖羅倫素迎戰新西蘭球隊奧克蘭，聖羅倫素備受熱捧齋Ｗ得1.14倍，只因「南美冠軍」名牌效應受高估，小心中伏。奧克蘭師承英式硬朗，防守穩健，即使輸波估計亦係小敗居多，寧願揀1.88倍入球細。

（無綫翡翠台及ＴＶＢ13周四凌晨3時30分直播）

聖羅倫素喺剛過去嘅阿甲一直徘徊中游，整體演出走下坡，南美球隊近年人才流失，並非奉旨入到決賽，過去4屆有兩屆決賽冇南美球隊份，切勿對佢哋抱太大希望。奧克蘭憑典型弱隊穩守突擊風格連過兩關，戰術上亦以長傳高空轟炸為主。相信今場奧軍死守博偷襲，將會係一場攻防戰，入波唔會多。

第5名之爭，阿爾及利亞球隊施迪夫對澳職西悉尼流浪者，呢場波意義唔大，雙方應會踢得更放，首選入球大。

（無綫翡翠台及ＴＶＢ13周四凌晨零時30分直播）