波圖-2有鑊氣

猪拉多纳

聯賽搶分搵塞圖巴爾祭旗

今晚十幾場波，最穩陣之選肯定係葡超波圖主場對塞圖巴爾，兩隊實力差距懸殊，近十次對賽波圖全部贏晒，呢支班霸經歷上輪榜首大戰不敵賓菲加後，更加要落力搶分，勢必大炒「私房菜」洩憤。讓球主客和波圖讓兩球，照捧讓球主勝。

（有線155台周六凌晨4時30分直播）

波圖上輪聯賽主場吞賓菲加兩蛋，搞到被對方拋離六分，未來賽事更加要醒醒定定。以波圖人腳實力，相信可以迅速反彈，前鋒積臣馬天尼斯今季聯賽已有十球進帳，高踞射手榜一哥，塞圖巴爾防線擋佢唔住。事實上，波圖對弱隊一向唔手軟，早前炒過里奧艾維五蛋，更何況依家急需贏波重振軍心，絕對唔會放過近七仗六敗嘅塞圖巴爾。

德乙亦值得留意，海登咸主場對布倫瑞克，前者實力已經見底，近四仗入得一球，冇晒季初氣勢。反觀布倫瑞克愈戰愈勇，南韓中場柳承佑好Sharp醒，傳射能力俱佳，前鋒夏華尼爾遜已有八球進帳，今仗有力反客為主，平手盤要布倫瑞克。
柏林聯當弗受讓要得過

另外，柏林聯近四仗三勝一和，正值當頭起，作客對近四仗三負嘅杜塞爾多夫，高下立見，柏林聯受讓當然揀讓球客勝。