直擊英聯盃決賽 有今生冇來世

猪拉多纳

黑過墨斗嘅利物浦，上周聯賽作客奧脫福球場慘吞死敵曼聯3隻光蛋，今晚英超返番晏菲路主場硬撼阿仙奴，Peter覺得以佢哋有限嘅人腳，若果能逼和強隊止吓血已算收貨。

阿仙奴一眾「十字兵」如阿迪達、禾確特、奧斯爾逐漸康復，不過佢哋能否出場仍屬未知之數。紅軍本身狀態麻麻，就算上周中英聯盃3比1擊敗英冠仔般尼茅夫，表現只係一般，主帥羅渣士亦心裏有數，故此今仗對阿仙奴唔好亂攻，有紀律地防守，喺聖誕假期前攞番場和波，相信老闆及球迷都唔會太失望。至於早場東北打吡紐卡素對新特蘭，預計和波機會高唱入雲。
入新溫布萊還心願

啱啱提到紅軍喺英聯盃晉級，將會喺4強火併車路士，另一場熱刺就對英甲仔錫菲聯，前者出線機會好高，無論對「紅」抑或「藍」亦係強勁戲碼。所以Peter決定農曆新年之後同一班香港球迷，去現場欣賞英聯盃決賽，畢竟Peter年紀唔細喇，能夠踩入新溫布萊球場，睇場咁有分量嘅冠軍戰，仲唔係有今生冇來世？
金句：作客奧脫福輸咗，今晚晏菲路主場和番