Fit爆拉素 「客」窒國米

猪拉多纳

米蘭羅馬雙雄本周捉對廝殺！除咗AC米蘭火併羅馬外，國際米蘭今夜亦喺聖西路擺擂台鬥拉素，文仙尼回歸國米開齋後，當然想乘勝追擊，但遇着今季硬淨嘅拉素絕對難搞，隨時喺主場吃一記悶棍。

（TVB301台周一凌晨3:45直播）

國米上場淨勝基爾禾兩球，中止聯賽兩連敗走勢，文仙尼嘅4-3-1-2陣式似乎收效，6成幾控球，533次傳送，數據相當亮麗，但唔好忘記基爾禾實力一般，下半場亦踢少個，國米先至贏得輕鬆兼保持清白之身，不過拉素戰鬥力唔同咁講法，尤其係隊長莫利呢排好Fit，對上兩場入3粒，加埋兩個菲臘仔─佐積域同安達臣，足以攪亂失咗21球嘅國米後防，咪忘記後備仲有殺手高路斯，上季首循環就係靠佢一箭定江山。
國米球迷唔想巴神回歸

國米教練文仙尼話，以聯賽第3名為目標，依家落後拉素6分排11，佢回巢後想搵契仔巴洛迪利幫手，球迷高呼唔好，副會長辛尼迪亦表明巴神唔係目標，事實上隊波現有鋒力ok，莫路伊卡迪、柏拉斯奧，仲有新加盟嘅奧斯華度添，前兩者上季主場大炒拉素4:1時夾埋入咗3球，不過今季國米表現一般，反而拉素仲Sharp，此消彼長，未必可以重演大勝一幕。賽前，靴蘭尼斯復操，有望同文仙尼齊齊倒戈。

拉素就有馬高柏洛路停賽後回歸，碧基亞整親，同養傷嘅簡達華都要到一月先復出，列迪斯馬將取代佢嘅防中位置。歇冬前最後一輪，肯定大家都會搏盡，不愁入波。