英超紅白 蓄勢待發！

猪拉多纳

熱刺變富豪 曼聯再燒錢

日本NHK電視台每年除夕都有「紅白歌合戰」陪粉絲，今晚英超亦提前搞番場「紅白波合戰」，由熱刺喺主場迎戰曼聯，合演2014年最後最激嘅一戰！兩軍今季都係雷聲大雨點小，不過隨住曼聯近排8戰7勝強勢回勇，熱刺亦盛傳被卡塔爾政府買起，一舉變身超級富豪，嚟緊隨時有大動作，今晚呢場「英超紅白大戰」，大家又點可以錯過先？
卡塔爾政府 掟121億收購熱刺

熱刺新帥普捷天奴畀唔到人驚喜，不過英國傳媒透露，熱刺球迷嚟緊可能收到份超級新年大禮，因為已經手執巴黎聖日耳門股權嘅卡塔爾政府，準備再次出手收購一間英超球會，為主辦2022年世界盃造勢，卡塔爾體育大臣阿爾阿里已「100%承認」呢單消息係堅嘅，而據講呢位幸運兒，就係倫敦老牌球會熱刺，有傳個價高達10億鎊（約121億港元）！

雖然熱刺老細利維勁有個性，曾堅拒為錢賣走莫迪歷同加里夫巴利，可惜球迷始終唔賣帳，最近仲發起倒台行動，加埋奇連士文又話利維喺過去10年，用足9個領隊非常短視，好難獲得真正嘅成功，搞到利維勁無癮，有好價賣盤，天公地道吖。
巴利、列奧斯 尹戈爾目標一大堆

「白組」2015年蓄勢待發，好在「紅組」都唔執輸，曼聯打算用天價硬撬加里夫巴利，意外地有5成皇馬迷覺得賣得過，「紅魔」領隊尹戈爾，又要求買馬高列奧斯、史杜特文同曉姆斯，計埋佢上任後唔睇價錢式嘅買人方針，假如掃貨行動成功，上任兩年動用嘅轉會費，就會高達3億鎊（約36億港元）！

「紅魔」除咗已經回復世界級勁旅本色，「魔躉」仲有其他新年禮物，例如尹戈爾下令球員離開奧脫福或者訓練場嘅時候，唔可以即刻揸車鬆人，相反要喺門口停一停畀機會球迷簽名合照，就算坐大巴都要主動落車，甚至試過嗌法卡奧去招呼擁躉添！「紅白勢力」出年來勢洶洶，今晚2014最後一戰，點可以唔埋個靚尾呀？