Ｃ朗愛拚才會贏

猪拉多纳

精彩嘅2014年快將完結，若要選全年最佳男主角，C朗絕對係當之無愧。死敵美斯之前連奪4屆金球獎，巴塞亦長期壓住皇馬，畀着其他人都會氣餒，但C朗始終一如以往，努力不懈地操練同認真比賽，源源不絕嘅入球紀錄，體現出嗰種愛拚才會贏嘅精神，從年頭重奪金球獎開始，C朗便勢如破竹，呢種永不服輸嘅鬥志，同時亦帶動埋皇馬前進，西盃、歐聯、歐超盃及世冠盃先後得手，將近年巴塞領導球壇嘅勢頭完全逆轉。
破巴塞壟斷 艦隊邁步向前

雖然有人話美斯天分更佳，但C朗後天努力一樣咁重要，長期保持高水準絕非易事，背後所付出嘅汗水同日積月累嘅傷患，係佢重登「冧巴溫」不為人知嘅代價。展望2015年，預計C朗同皇馬會持續強勢，細鬼都做過球員，明白到長期畀人騎住做二奶嘅感覺勁難受，依家難得打破巴塞嘅壟斷，梗係想繼續威落去喇，呢種對成功不斷渴求嘅欲望，正係推動佢同「銀河艦隊」繼續向前走嘅動力。今晚皇馬喺杜拜同意甲沒落豪門AC米蘭「拍跳」，儘管只係熱身賽，但AC今非昔比，連中場核心本田圭佑都返咗日本備戰亞洲盃，憑乜嘢抵擋如日中天嘅「銀河艦隊」呢？相信皇馬可大勝一場迎接新年。