葉士域治做東歎查

猪拉多纳

超級地膽10場不敗

2014年即將完結，呢幾日小弟都反思過去一年有幾多得與失，犯錯唔緊要，最重要係知道錯乜，累積經驗加以改進，足球菠菜係一條孤獨而漫長嘅路，只有時刻嚴守紀律，調整心態，先可以成為真正強者，希望各位喺15年繼續加油！

今日場次唔多，樂比會採取較保守策略，留待周四英超快車尾輪，同埋周末足總盃及西甲重開至出擊，當中揀咗一場英冠葉士域治主場對查爾頓同大家研究。今屆英冠係近年最激烈一季，因為前列球隊分數拉得好近，到目前為止都未知鹿死誰手，但樂比較睇好葉士域治。

葉士域治自從12年11月由前愛爾蘭領隊麥卡菲執教後，表現愈嚟愈好，雖然佢係比較old school嘅英式領隊，但就掌握到球員特性，擅長激勵士氣，所以主場戰績佳，今季聯賽8勝2和1負，係英冠主場王。
查爾頓近兩個月僅1勝

雖然有人批評佢用人唯親，帶邊隊都重用番愛爾蘭球員，但從另一個角度睇，佢確實可以將一個平庸球員打造成球星，好似目前排射手榜首位、今季射入16球嘅戴利梅菲，今季就大放光芒，只要葉士域治留住佢同拍檔麥哥迪克，相信要衝擊英超難度唔大。

查爾頓係缺乏野心嘅球隊，季初搶夠分後，季中已有回落迹象，尤其係借將防中高基連提早返回阿仙奴後，削弱咗中場戰鬥力，今仗更有中場卡林哈里奧特停賽，可以話蝕晒章，面對狀態大勇10場不敗嘅葉士域治凶多吉少，捧主勝同入球大。

（開賽時間：周三凌晨3:45）
樂比推介：葉士域治（主勝、入球大）