靠喜鵲收復拆禮物日失地

猪拉多纳

今日係元旦日，肥叔先喺度祝各位讀者新年快樂，波運亨通。之前兩輪英超聖誕新年快車嘅走勢各走極端，「拆禮物日」車路士、曼聯、曼城等前列分子，均贏波贏盤大派禮物，點知兩日後佢哋走晒樣齊齊派蕉皮，尤其係車仔作客修咸頓，同埋曼聯作客熱刺，大戶已經醒目避開唔掂上盤，可惜是福不是禍，是禍躲不過，轉玩佢哋大盤亦係難逃厄運，喺2014年收爐戰咁樣臨尾香，簡直不堪回首。

除咗幾支勁旅唔益人外，連當日要讓波嘅阿士東維拉、昆士柏流浪、侯城亦約埋輸盤，其中後者竟然輸畀3個月未嘗一勝嘅李斯特城，連場爆冷，令一眾上盤客好似發咗場噩夢。
讓般尼半一未驚過

正所謂新年新開始，啱啱踏入2015年，係時候忘記背後努力面前，今日英超心水賽事，就係紐卡素主場迎戰般尼，後者上仗喺落後兩粒嘅劣勢下，奇迹地作客逼和曼城，不過肥叔認為「藍月亮」有輕敵之嫌，而且般尼第一個入波明顯係越位。

相反，同日紐卡素反勝愛華頓極有說服力，睇埋盤口，初盤「喜鵲」要讓到般尼半一咁辣，仲要係低水添，可見莊家對佢哋好有信心，預計佢哋可於新嘅一年大勝打響頭炮，上盤有買趁早。

(now 633及660周四晚11時直播)